ÞY GEARE ÞE WÆS AGAN FRAM CRISTES ACENnesse .cccc. wintra 7 .xciiii. uuintra, þa Cerdic 7 Cynric his sunu cuom up æt Cerdicesoran mid .v. scipum; 7 se Cerdic wæs Elesing, Elesa Esling, Esla Gewising, Giwis Wiging, Wig Freawining, Freawine Friþugaring, Friþugar Bronding, Brond Bęldæging, Bęldæg Wodening. Ond þæs ymb .vi. gear þæs þe hie up cuomon geeodon Westseaxna rice, 7 þæt uuærun þa ærestan cyningas þe Westseaxna lond on Wealum geeodon; 7 he hæfde þæt rice .xvi. gear, 7 þa he gefor, þa feng his sunu Cynric to þam rice 7 heold .xvii. winter. Þa he gefor, þa feng Ceol to þam rice 7 heold .vi. gear. Þa hie gefor, þa feng Ceolwulf to his broþur, 7 he ricsode .xvii. gear, 7 hiera cyn gęþ to Cerdice. Þa feng Cynegils Ceolwulfes broþur sunu to rice 7 ricsode .xxxi. wintra, 7 he onfeng ærest fulwihte Wesseaxna cyninga, 7 þa feng Cenwalh to 7 heold .xxxi. wintra, 7 se Cenwalh wæs Cynegilses sunu; 7 þa heold Seaxburg his cuen an gear þæt rice æfter him. Þa feng Æscwine to rice, þæs cyn gęþ to Cerdice, 7 heold .ii. gear. Þa feng Centwine to Wesseaxna rice Cynegilsing 7 ricsode .vii. gear. Þa feng Ceadwalla to þam rice, þæs cyn gęþ to Cerdice, 7 heold .iii. gear. Ða feng Ine to Seaxna rice, þæs cyn gęþ to Ceardice, 7 heold .xxxvii. wintra. Þa feng Ęþelheard to, þæs cyn gęþ to Ceardice, 7 heold .xiiii. winter. Þa feng Cuþred to, þæs cyn gęþ to Cerdice, 7 heold .xvii. gear. Þa feng Sigebryht to, þæs cyn gęþ to Cerdice, 7 heold an gear. Þa feng Cynewulf to rice, þæs cyn gæþ to Ceardice, 7 heold .xxxi. wintra. Þa feng Beorhtric to rice, þæs cyn gęþ to Cerdice, 7 heold .xvi. gear. Þa feng Ecgbryht to þam rice 7 heold .xxxvii. wintra 7 .vii. monaþ, 7 þa feng Ęþelwulf his sunu to 7 heold nigonteoðe healf gear. Se Ęþelwulf wæs Ecgbryhting, Ecgbryht Ealhmunding, Ealhmund Eafing, Eafa Eopping, Eoppa Ingilding, Ingild Cenreding, 7 Ine Cenreding 7 Cuþburg Cenreding 7 Cuenburg Cenreding, Cenred Ceolwalding, Ceolwald Cuþwulfing, Cuþwulf Cuþwining, Cuþwine Celming, Celm Cynricing, Cynric Cerdicing. Ond þa feng Ęþelbald his sunu to rice 7 heold .v. gear. Þa feng Ęþelbryht his broþur to 7 heold .v. gear. Þa feng Ęþered hiera broþur to rice, 7 heold .v. gear. Þa feng Ęlfred hiera broþur to rice, 7 þa was agan his ielde .xxiii. wintra 7 .ccc. 7 .xcvi. wintra þæs þe his cyn ærest Westseaxna lond on Wealum ge<e>odon.
AER Cristes geflæscnesse .lx. wintra, Gaius Iulius se casere ærest Romana Bretenlond gesohte 7 Brettas mid gefeohte cnysede 7 hie oferswiþde 7 swa þeah ne meahte þær rice gewinnan.
Octauianus ricsode .lxvi. wintra, 7 on þam .lxii. geare his rices Crist wæs acenned.
Þa tungelwitgan of eastdęle cuomon to þon þæt hie Crist weorþedon 7 þa cild on Bethlem ofslægene wærun for Cristes ehtnesse from Herode.
Her swealt Herodus from him selfum ofsticod, 7 Archilaus his sunu feng to rice.
From frymþe middangeardes oþ þis gear wæron agan .v. þusendu wintra 7 .cc. wintra.
hand8a: Her onfeng Herodes Antipatres sunu to rice in Iudea.
& Philippus 7 Herodes todældun Lyssiam 7 Iudeam feoþericum todęldun.
Her feng Tiberius to rice.
Her onfeng Pilatus gyminge ofer Iudeas.
hand8: Her onfeng Pilatus to gymenne ouer þa Iudeas.
Her wæs Crist gefulluhtud 7 Petrus 7 Andreas gehwierfede 7 Iacobus 7 Iohannes 7 Philippus 7 þa .xii. apostolas.
Her wæs Crist ahangen, from fruman middangeardes ymb .v. þusendo wintra 7 .cc. 7 .xxvi. wintra.
Her wæs Paulus gehwierfed, 7 sanctus Stephanus oftorfod.
Her se eadiga Petrus se apostol gesæt biscepsetl in Antiochia þære ceastre.
Her onfeng Gaius rice. hand8: Anno .xliiii.
[n44.1] Her se eadiga Petrus se apostol gesæt biscepsetl on Rome.
[n45.1] Her Herodes aswalt, se þe Iacobum ofslog ane geare ær his agnum deaþe.
[n46.1] Her Claudius oþer Romana cyninga Bretene lond gesohte 7 þone mæstan dęl þæs ealondes on his gewald onfeng, 7 eac swelce Orcadus þa ealond Romana cynedome underþeodde. hand8: Þis was þes feorðes geares his rices, 7 on þys ylcan geare gewearð se mycela hunger on Siria þe Lucas recð on þare boc Actus Apostolorum.
Her Iacobus frater Domini þrowode.
Her Marcus se godspellere forþferde.
Her Petrus 7 Paulus þrowodon.
Her Uespassianus onfeng rice.
Her Titus Uespassianus sunu in Hierusalem ofslog Iudea .cxi þusenda.
Her Titus feng to rice, se þe sęde þæt he þone dæg forlure þe he noht to gode on ne gedyde.
[n83.1] Her Domittianus Tites broþur feng to rice.
[n84.1] Her Iohannes se godspellere in Pathma þam ealonde wrat þa boc Apocalipsis.
< Her Simon Petrus wæs ahangen, 7 Iohannes se godspellere hine gereste in Effesio. >
Her Clemens papa forþferde.
hand8: Her Symon se apostol wæs anhangen 7 Iohannes se godspellere hine gereste in Epheso.
hand8: Her Clemens papa forþferde.
Her Ignatus biscep þrowude.
hand8: Her Marcus Antonius 7 Aurelius his broðer fengon to rice.
Her Eleutherius on Rome onfeng biscepdom 7 þone wuldorfæstlice .xv. winter geheold. To þam Lucius Bretene kyning sende stafas, będ þæt he wære cristen gedon, 7 he þurhteah þæt he będ. hand8: 7 hi syððon wunodon on rihton geleauon oððe Diaclitianes rice.
Her Seuerus onfeng rice 7 ricsode .xvii. winter, se Bretenlond mid dice begyrdde from sę oþ sę. hand8: 7 þa geendode on Euerwic, 7 Bassianus his sunu feng to rice.
hand12: Twa hund gæra.
hand12: ?????.
hand8: Her þowade sanctus Albanus martyr.
[n300.1] hand12: Þreo hund gæra.
hand12: Þreo hund gæ ....
hand8: Her Gratianus feng to rice.
Her Maximianus se casere feng to rice -- he wæs on Bretenlonde geboren -- 7 þonne for in Gallia hand8: 7 he ðar ofsloh ðone casere Gratianum 7 his broðer adraf of æðele, se was gehaten Ualentinianus, 7 se Ualentinianus eft gesanode werod 7 ofsloh Maximum 7 feng to rice. On þam timan aras Pelagies gedwyld geond middaneard. [n381.1]
[n409.1] Her Gotan abręcon Romeburg, 7 næfre siþan Romane ne ricsodon on Bretone. hand8: Þæt wæs embe .xi. hund wintra 7 .x. wintra þes þe heo getimbred was. Ealles hi ðær rixodon on Brytene feower hund wintra 7 hund seouanti wintra syþþan ærost Gaius Iulius þæt land ærost gesohte.
Her Romane gesomnodon al þa goldhord þe on Bretene wæron 7 sume on eorþan ahyddon þæt hie nænig mon siþþan findan ne meahte 7 sume mid him on Gallia lęddon.
hand8: [n423.2] Her Ðeodosius se gingra feng to rice.
Her Paladius se biscep wæs onsended to Scottum þæt he hiera geleafan trymede from Cęlestino þam papan.
hand8: Her sendon Brytwalas to Rome 7 heom fultomes bædon wiþ Piohtas, ac hi þar næfdan nanne, forþan ðe hi fyrdedon wið Ætla Huna cyningæ, 7 þa sendon hi to Anglum 7 Angelcynnes æðelingas ðæs ylcan bædan.
Her Mauricius 7 Ualentines onfengon rice 7 ricsodon .vii. winter. 7 On hiera dagum Hengest 7 Horsa from Wyrtgeorne geleaþade Bretta kyninge gesohton Bretene on þam staþe þe is genemned Ypwinesfleot, ærest Brettum to fultume, ac hie eft on hie fuhton. hand8: Se cing het hi feohtan agien Pihtas, 7 hi swa dydan 7 sige hæfdan swa hwar swa hi comon. Hi ða sende to Angle 7 heton heom sendan mare fultum 7 heom seggan Brytwalana nahtnesse 7 ðæs landes cysta. Hy ða sendan heom mare fultum. Þa comon þa menn of þrim mægþum Germanie, of Ealdseaxum, of Anglum, of Iotum. Of Iotum comon Cantware 7 Wihtware, þæt ys seo mæið ðe nu eardað on Wiht, 7 ðæt cynn on Westsexum þe man gyt hæt Iutna cyn. Of Ealdseaxon comon Eastsexa 7 Suðsexa 7 WestSexan. Of Angle comon, se a siððan stod westi betwyx Iutum 7 Seaxum, Eastengla, Midelangla, Mearca 7 ealle Norðhymbra.
Her Hengest 7 Horsa fuhton wiþ Wyrtgeorne þam cyninge, in þære stowe þe is gecueden Agęlesþrep, 7 his broþur Horsan man ofslog; 7 æfter þam Hengest feng to rice 7 Æsc his sunu.
Her Hengest 7 Æsc fuhton wiþ Brettas in þære stowe þe is gecueden Crecganford 7 þær ofslogon .iiiim. wera, 7 þa Brettas þa forleton Centlond 7 mid micle ege flugon to Lundenbyrg.
Her Hengest 7 Æsc gefuhton uuiþ Walas neah Wippedesfleote 7 þær .xii. wilisce aldormenn ofslogon, 7 hiera þegn an þær wearþ ofslægen, þam wæs noma Wipped.
Her Hengest 7 Æsc gefuhton wiþ Walas 7 genamon unarimedlico herereaf, 7 þa Walas flugon þa Englan swa þęr fyr.
Her cuom Ęlle on Bretenlond 7 his .iii. suna, Cymen 7 Wlencing 7 Cissa, mid .iii. scipum on þa stowe þe is nemned Cymenesora, 7 þær ofslogon monige Wealas 7 sume on fleame bedrifon on þone wudu þe is genemned Andredesleage.
Her Ęlle gefeaht wiþ Walas neah Mearcrędesburnan stęðe.
Her Æsc feng to rice 7 was .xxiiii. wintra Cantwara cyning.
Her Ęlle 7 Cissa ymbsæton Andredescester 7 ofslogon alle þa þe þærinne eardedon; ne wearþ þær forþon an Bret to lafe.
Her cuomon twegen aldormen on Bretene, Cerdic 7 Cynric his sunu, mid .v. scipum in þone stede þe is gecueden Cerdicesora 7 þy ilcan dæge gefuhtun wiþ Walum.
Her cuom Port on Bretene 7 his .ii. suna Bieda 7 Mægla mid .ii. scipum on þære stowe þe is gecueden Portesmuþa 7 ofslogon anne giongne brettiscmonnan, swiþe ęþelne monnan.
Her Cerdic 7 Cynric ofslogon ænne brettisccyning, þam was nama Natanleod, 7 .v. þusendu wera mid him. Æfter was þæt lond nemned Natanleaga oþ Cerdicesford.
Her cuomon Westseaxe in Bretene mid .iii. scipum in þa stowe þe is gecueden Cerdicesora, 7 Stuf 7 Wihtgar, 7 fuhton wiþ Brettas 7 hie gefliemdon.
Her Cerdic 7 Cynric hand8: Westsexena rice onfengun on þy ilcan geare hie fuhton wiþ Brettas þær mon nu nemneþ Cerdicesford. hand8b: 7 siþþan ricsadan Westsexana cynebearn of þan dæge.
Her Cerdic 7 Cynric fuhton wiþ Brettas in þære stowe þe is gecueden Cerdicesleaga.
Her Cerdic 7 Cynric genamon Wihte ealond 7 ofslogon feala men on Wihtgarabyrg.
Her Cerdic forþferde, 7 Cynric his sunu ricsode forþ .xxvi. wintra; 7 hie saldon hiera tuæm nefum Stufe 7 Wihtgare eall Wiehte ealond.
Her sunne aþiestrode .xiiii. dagum ær kalendas Martii from ærmergenne oþ undern.
Her sunne aþiestrode on .xii. kalendas Iulius, 7 steorran hie oðiewdon fulneah healfe tid ofer undern.
Her Uuihtgar forþferde, 7 hiene mon bebyrgde on Wihtgarabyrg.
Her Ida feng to rice, þonon Norþanhymbra cynecyn onwoc hand8: 7 rixode twelf gear. 7 he timbrode Bebbanburh. seo was ærost mid hegge betyned. 7 þaræfter mid wealle. Ida wæs Eopping, Eoppa wæs Esing, Esa Inguing. Ingui Angenwiting. Angenwit Aloching. Aloc Beonocing. Beonoc Branding, Brand Bældæging. Bældæg Wodening. Woden Friþowulfing, Friþowulf Finning. Finn Godwulfing. Godwulf Geating.
[n552.1] Her Cynric gefeaht wiþ Brettas in þære stowe þe is genemned æt Searobyrg. 7 þa Bretwalas gefliemde. Cerdic wæs Cynrices fæder. Cerdic Elesing. Elesa Esling. Esla Gewising. Gewis Wiging. Wig Freawining. Freawine Friþogaring. Friþogar Branding. Brand Bęldæging. Bęldæg Wodening.
Her Cynric 7 Ceawlin fuhton wiþ Brettas æt Beranbyrg.
Her Ceawlin feng to rice on Wesseaxum, 7 Ęlle feng to Norþanhymbra rice 7 heold .xxx.wintra. Ælle wæs Yffing. Yffe Uscfreaing. Uscfrea Wilgisling. Wilgisl Westerfalcning. Westerfalcna Sæfugling. Sæfugl Sæbalding. Sæbald Sigegeating. Sigegeat Swæfdæging. Swæfdæg Sigegearing. Sigegear Wægdæging. Wægdæg Wodening. Woden Friþowulfing. hand8: rice, Idan forþgefarenum. 7 heora ægþer rixade .xxxti. wintra.
Her Columba mæssepreost of Scottum com in Brettas to lærenne Peohtas 7 in Hi þam ealonde mynster worhte. hand8: Her feng Æðelbriht to Cantwara rice. 7 heold .liii. wintra. On his dagum sende Gregorius us fulluht 7 Columba mæssepreost com to Pihtum. 7 hi gecyrde to Cristes geleauan. Þæt synd þonne wærteras be norðum morum. 7 heora cyng him gesealde þæt igland ðe man Ii nemnað. þar syndon fif hida. þæs ðe man seggað. Þar se Columban getimbrade mynster, 7 he þar was abbod .xxxii. <wintra> 7 þar forðferde. þa he was .lxxvii. wintra. Ða stowe habbað gyt his yrfnuman. Suþ Pihtas wæron ær gefullode of Ninna biscope. se was on Rome gelæred. His mynster ys Hwiterne on Sanctus Martines naman gehalgod. þar he resteð mid manegum halgum. Nu sceal beon æfre on Ii abbod, 7 na biscop. 7 þan sculon beon underðeodde ealle Scotta biscopas. for þan þe Columban was abbod, na biscop.
Her Ceaulin 7 Cuþa gefuhton wiþ Ęþelbryht. 7 hine in Cent gefliemdon, 7 tuegen aldormen on Wibban dune ofslogon, Oslaf 7 Cnebban.
Her Cuþwulf feaht wiþ Bretwalas æt Bedcan forda. 7 .iiii. tunas genom, Lygeanburg. 7 Ægelesburg. Benningtun. 7 Egonesham. 7 þy ilcan geare he gefor.
Her Cuþwine 7 Ceawlin fuhton wiþ Brettas, 7 hie .iii. kyningas ofslogon, Coinmail, 7 Condidan, 7 Farinmail, in þære stowe þe is gecueden Deorham. 7 genamon .iii. ceastro Gleawanceaster, 7 Cirenceaster, 7 Baþanceaster.
hand8: Her Mauricius feng to Romana rice.
Her Ceawlin 7 Cuþa fuhton wiþ Brettas, in þam stede þe mon nemneþ Feþanleag. 7 Cuþan mon ofslog. 7 Ceaulin monige tunas genom, 7 unarimedlice herereaf, 7 ierre he hwearf þonan to his agnum.
Her Ęlle cyning forþferde, 7 Ęþelric ricsode æfter him .v. gear.
Her micel węlfill wæs æt Woddesbeorge, 7 Ceawlin wæs ut adrifen. hand8: 7 Gregorius feng to papdome on Rome.
Her Ceawlin 7 Cuichelm 7 Crida forwurdon, 7 Ęþelfriþ feng to rice hand8: on Norðhymbrum.
hand8: Her Gregorius papa sende to Brytene Augustinum. mid wel manegum munecum. þe Godes word Engla ðeoda godspelledon.
Her Gregorius papa sende to Bretene Augustinum. mid wel monegum munecum. þa Godes word Engla þeode godspellian.
Her ongon Ceolwulf ricsian on Wesseaxum, 7 simle he feaht 7 won, oþþe wiþ Angelcyn, oþþe uuiþ Walas, oþþe wiþ Peohtas, oþþe wiþ Scottas; se wæs Cuþaing. Cuþa Cynricing, Cynric Cerdicing, Cerdic Elesing, Elesa Esling, Esla Gewising, Giwis Wiging, Wig F<r>eawining, Freawine Friþugaring, Friþugar Bronding, Brond Bęldæging, Bęldæg Wodening.
Her sende Gregorius papa Agustino ærcebiscepe pallium in Bretene, 7 wel monige godcunde lareowas him to fultome; 7 Paulinus biscep gehwerfde Edwine Norþhymbra cyning to fulwihte.
Her wæs gefeoht æt Egesan stane. hand8: Ægþan Scotta cyng feaht wið Dælreoda, 7 wið Æðelferþe Norþhymra cynge æt Dægstane, 7 man ofsloh mæst ealne his here.
Her East Seaxe onfengon geleafan 7 fulwihtes bæð under Sæbyrhte cyninge hand8: Augustinus gehalgode .ii. biscopas, Mellitum 7 Iustum, Mellitum he sende to bodiende Eastseaxum fulluht, ðar was se cing gehaten Sæbyrht, Ricolan sunu, Æðelberhtes swyster, ðone Æðelbyrht gesette to cynge. 7 Æðelberht gesealde Mellite biscopsetl on Lundewic. 7 Iusto on Hrouecystre, seo ys .xxiiii. mila fram Dorwitceastre.
Her forþferde Gregorius ymb .x. gear þæs þe he us fulwiht sende 7 his fæder wæs haten Gordianus hand8: And her Æðelfrið lædde his færde to Legercyestre, 7 ðar ofsloh unrim Walena. 7 swa wearþ gefyld Augustinus witegunge. þe he cwæþ: 'Gif Wealas nellað sibbe wið us. hi sculan æt Seaxana handa farwurþan'. Þar man sloh eac .cc. preosta ða comon ðyder þæt hi scoldon gebiddan for Walena here. Scrocmail was gehaten heora ealdormann, se atbærst ðanon fiftiga sum.
Her Ceolwulf gefeaht wiþ Suþseaxe.
Her Cynegils feng to rice on Wesseaxum 7 heold .xxxi. wintra. Cynegils wæs Ceoling, Ceol Cuþaing, Cuþa Cynricing.
Her Cynegils 7 Cuichelm gefuhton on Beandune, 7 ofslogon .ii. þusendo Wala 7 .xlvi.
Her Ęþelbryht Contwara cyning forþferde, 7 Eadbald his sunu feng to rice, 7 þy ilcan geare wæs agan fram frymþe middangeardes fif þusendu wintra 7 .dccc. hand8: Se forlet his fulluht, 7 leouode on hæðenum þeawe swa þæt he hæfde his fæder laue to wiue. Þa mynte Laurentius ðe þa was ercebiscop on Cent þæt he wolde suð ofer sæ 7 eall forlæton. Ac him com to on niht se apostol Petrus 7 hine hetelice swang, forðan ðe he wolde Godes hyrde forlæton 7 het hine gan to þam cynge 7 bodian him rihtne geleafan. 7 he swa dyde 7 se cing gecyrde to rihtan geleauan. On þyses cinges dagum Laurentius ercebiscop se was on Cent æfter Agustine forþferde .iiii. nonas Februarii 7 he was bebyred be Agustine. Æfter him feng Mellitus to arcebiscopdome se was biscop of Lundene 7 þas binnan fif wintre Mellitus fo<r>ðferde. Þa æfter him feng to arcebiscopdome Iustus, se was biscop of Hrouecistre, 7 þar to gehalgode Romanum to biscope.
Her Paulinus fram Iusto þam ercebiscop wæs gehadod Norþhymbrum to biscepe.
Her Eanflęd Edwines dohtor cyninges wæs gefulwad in þone halgan æfen Pentecosten. 7 Penda hæfde .xxx. wintra rice 7 he hæfde .l. wintra þa þa he to rice feng. Penda wæs Pybbing, Pybba Cryding, Cryda Cynewolding, Cynewold Cnebbing, Cnebba Iceling, Icel Eomæring, Eomær Angelþeowing, Angelþeow Offing, Offa Wærmunding, Wærmund Wihtlæging, Wihtlæg Wodening.
Her Edwine kyning wæs gefulwad mid his þeode on Eastron.
Her Cynegils 7 Cuichelm gefuhtun wiþ Pendan æt Cirenceastre, 7 geþingodan þa.
Her was Eorpwald gefulwad.
Her Edwine wæs ofslægen, 7 Paulinus huerf eft to Cantwarum, 7 gesæt þæt biscepsetl on Hrofesceastre.
Her Birinus biscep bodude West Seaxum fulwuht.
Her Cynegils wæs gefulwad from Birino þæm biscep in Do<r>keceastre, 7 Oswold his onfeng.
Her Cuichelm wæs gefulwad in Dorcesceastre, 7 þy ilcan geare forþferde; 7 Felix biscep bodade East Englum Cristes geleafan.
Her Birinus fulwade Cuþręd on Dorcesceastre, 7 onfeng hine him to suna.
Her Redbald Cantwara cyning forþferde, 7 he ricsode .xxv. wintra. hand8c: He hæfde twegene sunu Ermenred 7 Ercenberht. 7 þes Ercenberht rixode æfter his fæder. 7 Ermenred gestrynde twegen sunu. þa syððan wurðan gemartirode of Ðunore.
Her Oswald Norþanhymbra cyning ofslægen wæs.
Her Cenwalh feng to Wesseaxna rice 7 heold .xxxi. wintra, 7 se Cenwalh het atimbran þa ciricean on Wintanceastre.
Her Paulinus forþferde se was ærcebiscep on Eoforwicceastre, 7 eft on Hrofesceastre.
Her Cenwalh adrifen wæs from Pendan cyninge.
Her Cenwalh wæs gefulwad.
Her Cenwalh gesalde Cuþrede his mæge .iii. þusendo londes be Æscesdune; se Cuþred wæs Cuichelming, Cuichelm Cynegilsing.
Her Ęgelbryht of Galwalum æfter Birine þam Romaniscan biscepe onfeng Wesseaxna biscepdome.
Her Oswine kyning wæs ofslægen, 7 Aidan biscep forþferde.
Her Cenwalh gefeaht æt Bradanforda be Afne.
Her Middelseaxe onfengon under Peadan aldormen ryhtne geleafan.
Her Onna cyning wearþ ofslægen, 7 Botulf ongon mynster timbran æt Icanho.
Her Penda forwearþ, 7 Mierce wurdon Cristne. Þa was agan from fruman middangeardes <.v. þusendo> wintra 7 .dccc. 7 .l. wintra, 7 Pe<a>da feng to Mercna rice Pending.
Her forþferde Peada, 7 Wulfhere Pending feng to Miercna rice.
Her Cenwalh gefeaht æt Peonnum wiþ Walas, 7 hie gefliemde oþ Pedridan. Þis wæs gefohten siþþan he of Eastenglum com; he wæs þær .iii. gear on wrece, hæfde hine Penda adrifenne, 7 rices benumenne. forþon he his swostor anforlet.
Her Ægelbryht biscep g(e)ewat from Cenwale, 7 Wine heold þone biscepdom .iii. gear; 7 se Ægelbryht onfeng Persa biscepdomes on Galwalum bi Signe.
Her Cenwalh gefeaht in Eastron on Posentesbyrg, 7 gehergeade Wulfhere Pending oþ Æscesdune; 7 Cuþred Cuichelming, 7 Coenbryht cyning on anum geare forþferdun; 7 on Wiht gehergade Wulfhere Pending, 7 gesalde Wihtwaran Ęþelwalde Suþseaxna cyninge, forþon Wulfhere hine onfeng æt fulwihte. 7 Eoppa mæssepreost be Wilferþes worde 7 Wulfhere cyning brohte Wihtwarum fulwiht ærest.
Her sunne aþiestrode, 7 Arcenbryht Cantwara cyng forþferde; 7 Colman mid his geferum for to his cyððe. Þy ilcan geare wæs micel mancuealm; 7 Ceadda 7 Wilferþ wæron gehadode, 7 þy ilcan geare Deusdedit forþferde.
Her Þeodorius mon hadode to ercebiscep.
Her Ecgbryht cyning salde Basse mæsseprioste Reculf mynster on to timbranne.
Her forþferde Osweo Norþanhymbra cyning, 7 Ecgferþ ricsode æfter him; 7 Hloþhere feng to biscepdome ofer Wesseaxan Ægelbryhtes biscepes nefa. 7 heold .vii. gear, þeodor biscep hine gehalgode; 7 se Oswio wæs Ęþelferþing, Ęþelferþ Ęþelricing, Ęþelric Iding, Ida Eopping.
Her wæs þæt micle fugla węl.
Her forþferde Cenwalh 7 Seaxburg an gear ricsode his cuen æfter him. [n672.1]
Her Ecgbryht Cantwara cyning forþferde; 7 þy geare wæs senoð æt Heorotforda, 7 Sancte Ęþeldryht ongon þæt mynstær æt Elige.
Her feng Æscwine to rice on Wesseaxum, se wes Cenfusing, Cenfus Cenferþing, Cenferþ Cuþgilsing, Cuþgils Ceolwulfing, Ceolwulf Cynricing, Cynric Cerdicing.
Her Wulfhere Pending 7 Æscwine gefuhton æt Biedanheafde; 7 þy ilcan geare Wulfhere forþferde, 7 Ęþelręd feng to rice.
Her Æscwine forþferde, 7 Hedde feng to biscepdome, 7 Centwine feng to rice; 7 Centwine was Cynegilsing, Cynegils Ceolwulfing; 7 Ęþered Miercna cyning oferhergeada Centlond.
Her oþiewde cometa se steorra, 7 Wilfriþ biscop wæs adrifen of his biscopdome from Ecgferþe cyninge.
Her Ęlfwine wæs ofslægen, 7 Sancte Ęþelþryþ forþferde.
Her gesæt Þeodorius ærcebiscop senoþ on Hęþfelda, forþon he wolde þone <Cri>stes geleafan geryhtan; 7 þy ylcan geare forþferde Hild abbodesse on Streonesheale.
On þissum geare Centwine gefliemde Bretwealas oþ sę.
Her Ceadwalla ongan æfter rice winnan; Se Ceadwalla was Coenbryhting. Coenbryht Cading, Cadda Cuþaing, Cuþa Ceawlining, Ceawlin Cynricing, Cynric Cerdicing; 7 Mul was Ceadwallan broþur, 7 þone mon eft on Cent forbærnde; 7 þy ilcan geare Ecgferþ cyning mon ofslog; Se Ecgferþ was Osweoing, Osweo Ęþelferþing, Ęþelferþ Ęþelricing, Ęþelric Iding, Ida Eopping; 7 Hloþhere þy ilcan geare forþferde.
Her Ceadwalla 7 Mul Cent 7 Wieht forhergedon.
Her Mul wearþ on Cent forbærned, 7 oþre .xii. men mid him, 7 þy geare Ceadwalla eft Cent forhergeada.
Her Ine feng to Wesseaxna rice, 7 heold .xxxvii. wintra. hand6: 7 he getimbrade þæt menster æt Glæstingabyrig. [n688.1] 7 þy ilcan geare Ceadwalla for to Rome, 7 fulwihte onfeng from þam papan, 7 se papa hine heht Petrus. 7 ymb .vii. niht he forþferde. Þonne was se Ine Cenreding, Cenred Ceolwalding, Ceolwald was Cynegilses broþur, 7 þa wæron Cuþwines suna Ceaulininges, Ceaulin Cynricing, Cynric Cerdicing.
Her Þeodorius ærcebiscop forþferde, 7 feng Beorhtwald to þam biscepdome. Ær wærun Romanisce biscepas, siþþan wærun Englisce.
Her Cantware geþingodan wiþ Ine, 7 him gesaldon .xxx.m. forþon þe hie ær Mul forbærndon; 7 Wihtred feng to Cantwara rice, 7 heold .xxxiii. wintra; Se Wihtred was Ecgbryhting, Ecgbryht Arcenbryhting, Erconbryht Eadbalding, Eadbald Ęþelbryhting.
Her Hedde biscep forþferde, 7 he heold þone biscepdom .xxvii. wintra on Wintaceastre.
Her Ęþelred Pending Miercna cyning onfeng munuchade, 7 þæt rice heold .xxviiii. wintra. þa feng Coenred to.
Her Aldferþ Norþanhymbra cyning forþferde 7 Seaxuulf biscep.
Her Aldhelm biscep forþferde, se wæs be westan wuda biscep, 7 wæs todęled in foreweardum Danieles dagum in tua biscepscira Westseaxna lond, 7 ær hit wæs an; oþer heold Daniel, oþer Aldhelm; Æfter Aldhelme feng Forþhere to; 7 Ceolred feng to Miercna rice, 7 Coenred for to Rome 7 Offa mid him.
hand3: Her Beorhtfriþ ealdormon feaht wiþ Peohtas, 7 Ine 7 Nun his mæg gefuhton wiþ Gerente Wala cyninge. [n710.1]
Her forþferde Guþlac se halga.
Her Ine 7 Ceolred fuhton æt Woddesbeorge.
Her Osred Norþanhymbra cyning wearþ ofslægen, se hæfde .vii. winter rice 7 æfter Aldferþe. Þa feng Coenred to rice, 7 heold .ii. gear; þa Osric 7 heold .xi. gear. 7 on þam ilcan geare Ceolred Miercna cyning forþferde, 7 his lic resteþ on Licetfelda, 7 Ęþelrędes Pendinges on Bearddanigge; 7 þa feng Ęþelbald to rice on Mercium, 7 heold .xli. wintra. Ęþelbald wæs Alweoing, Alweo Eawing, Eawa Pybing, þæs cyn is beforan awriten; 7 Ecgbryht se arwierþa wer on Hii þam ealonde þa munecas on ryht gecierde þæt hie Eastron on ryht heoldon, 7 þa ciriclecan scare.
Her Ingild forþferde Ines broþur, 7 hiera swostur wærun Cuenburg 7 Cuþburg, 7 sio Cuþburg þæt liif æt Winburnan arærde, 7 hio wæs forgifen Norþanhymbra cyninge Aldferþe, 7 hie be him lifgendum hie gedældun.
Her Daniel ferde to Rome; 7 þy ilcan geare Ine ofslog Cynewulf.
Her Ęþelburg cuen towearp Tantun 7 Ine ær timbrede; 7 Aldbryht wræccea gewat on Suþrige 7 on Suþseaxe; 7 Ine (ge)gefeaht wiþ Suþseaxum.
Her Wihtręd Cantwara cyning forþferde, þæs cyn is beforan. hand8c: 7 Eadberht feng to Centrice. 7 Ine feaht wiþ Suþseaxan, 7 þær ofslog Aldbryht.
Her Ine ferde to Rome. hand6: 7 þær his feorh gesealde 7 feng Ęþelheard to Wesseaxna rice 7 heold .xiiii. gear. 7 þy geare gefuhton Ęþelheard 7 Oswald se ęþeling; 7 se Oswald was Ęþelbalding, Ęþelbald Cynebalding, Cynebald Cuþwining, Cuþwine Ceaulining.
Her cometa se steorra hiene oþiewde, 7 Sanctus Ecgbryht forþferde.
Her Oswald se ęþeling forþferde.
Her was ofslægen Osric Norþanhymbra cyning, 7 feng Ceoluulf to þam rice, 7 heold .viii. gear. 7 se Ceolwulf wæs Cuþaing, Cuþa Cuþwining, Cuþwine Leodwalding. Leodwald Ecgwalding, Ecgwald Aldhelming, Aldhelm Ocging, Ocga Iding, Ida Eopping; 7 Beorhtwald ærcebiscep gefor; 7 þy ilcan geare Tatwine (7) wæs gehalgod to ærcebiscepe.
Her Ęþelbald geeode Sumurtun; 7 sunne aþiestrode.
Her wæs se mona swelce he wære mid blode begoten; 7 ferdon forþ Tatwine 7 Bieda.
Her Noþhelm ærcebiscep onfeng pallium from Romana biscep.
Her Forþhere biscep 7 Friþogiþ cuen ferdun to Rome.
Her Eadbryht Eating, Eata Leodwalding, feng to Norþanhymbra rice 7 heold .xxi. wintra. 7 his broþor wæs Ecgbryht Eating ærcebiscep, 7 hie restaþ begen on Eoforwicceastre on anum portice.
Her Ęþelheard cyning forþferde, 7 feng Cuþręd to Wesseaxna rice, 7 heold .xvi. wintra, 7 heardlice gewon wiþ Ęþelbald cyning; 7 Cuþbryht wæs to ærcebiscepe gehalgod(e), 7 Dun biscep to Hrofesceastre.
Her Ęþelbald 7 Cuþręd fuhton wiþ Walas.
Her Danihel gesæt on Wintanceastre, 7 Hunferþ feng to biscepdome.
Her Danihel forþferde, þa was .xliii. wintra agan siþþan he onfeng biscepdome.
Her mon slog Selred cyning.
Her wæs ofslægen Cynric Wesseaxna ęþeling, 7 Eadbryht Cantwara cyning forþferde. hand8c: 7 Æthelbyrht Wihtredes sunu cinges feng to þam rice.
Her Cuþred cyning gefeaht uuiþ Ęþelhun þone ofermedan aldormonn.
Her Cuþred gefeaht þy .xii. geare his rices æt Beorgf(e)orda wiþ Ęþelbald.
Her Cuþred feaht wiþ Walas.
754 actually 756
Her Cuþred forþferde, 7 Cyneheard onfeng biscepdome æfter Hunferþe on Wintanceastre; 7 Cantwaraburg forbærn þy geare 7 Sigebryht feng to Wesseaxna rice 7 heold an gear.
755 actually 757
Her Cynewulf benam Sigebryht his rices 7 Westseaxna wiotan for unryhtum dędum buton Hamtunscire, 7 he hæfde þa oþ he ofslog þone aldormon þe him lengest wunode, 7 hiene þa Cynewulf on Andred adræfde 7 he þær wunade oþ þæt hiene an swan ofstang æt Pryfetesflodan; 7 he wręc þone aldormon Cumbran. 7 se Cynewulf oft miclum gefeohtum feaht uuiþ Bretwalum, 7 ymb .xxxi. wintra þæs þe he rice hæfde, he wolde adræfan anne ęþeling se was Cyneheard haten, 7 se Cyneheard wæs þæs Sigebryhtes broþur; 7 þa geascode he þone cyning lytle werode on wifcyþþe on Merantune 7 hine þær berad 7 þone bur utan beeode ær hine þa men onfunden þe mid þam kyninge wærun; 7 þa ongeat se cyning þæt 7 he on þa duru eode 7 þa unheanlice hine werede oþ he on þone ęþeling locude 7 þa ut ræsde on hine 7 hine miclum gewundode, 7 hie alle on þone Cyning wærun feohtende oþ þæt hie hine ofslægenne hæfdon 7 þa on þæs wifes gebærum onfundon þæs cyninges þegnas þa unstilnesse 7 þa þider urnon swa hwelc swa þonne gearo wearþ 7 radost 7 hiera se ęþeling gehwelcum feoh 7 feorh gebead 7 hiera nænig hit geþicgean nolde. Ac hie simle feohtende wæran oþ hie alle lægon butan anum Bryttiscum gisle 7 se swiþe gewundad wæs. Þa on morgenne gehierdun þæt þæs cyninges þegnas þe him beæftan wærun þæt se cyning ofslęgen wæs þa ridon hie þider 7 his aldormon Osric 7 Wiferþ his þegn 7 þa men þe he beæftan him læfde ær 7 þone ęþeling on þære byrig metton þær se cyning ofslægen læg 7 þa gatu him to belocen hæfdon 7 þa þærto eodon 7 þa gebead he him hiera agenne dom feos 7 londes gif hie him þæs rices uþon 7 him cyþdon þæt hiera mægas him mid wæron þa þe him from noldon 7 þa cuędon hie þæt him nænig mæg leofra nære þonne hiera hlaford 7 hie næfre his banan folgian noldon 7 þa budon hie hiera mægum þæt hie gesunde from eodon 7 hie cuędon þæt tæt ilce hiera geferum geboden wære þe ær mid þam cyninge wærun. Þa cuędon hie þæt hie hie þæs ne onmunden "þon ma þe eowre geferan þe mid þam cyninge ofslægene wærun". 7 hie þa ymb þa gatu feohtende wæron oþ þæt hie þærinne fulgon 7 þone ęþeling ofslogon 7 þa men þe him mid wærun alle butan anum se wæs þæs aldormonnes godsunu 7 he his feorh generede 7 þeah he wæs oft gewundad. 7 se Cynewulf ricsode .xxxi. wintra 7 his lic liþ æt Wintanceastre 7 þæs ęþlinges æt Ascanmynster 7 hiera ryhtfęder cyn gęþ to Cerdice 7 þy ilcan geare mon ofslog Ęþelbald Miercna cyning on Seccandune 7 his lic liþ on Hreopadune 7 Beornręd feng to rice 7 lytle hwile heold 7 ungefealice 7 þy ilcan geare Offa feng to rice 7 heold .xxxviiii. wintra 7 his sunu Egferþ heold .xli. daga 7 .c. daga. Se Offa wæs Þincgferþing Þincgferþ Eanwulfing, Eanwulf Osmoding, Osmod Eawing, Eawa Pybing, Pybba Creoding, Creoda Cynewalding, Cynewald Cnebing, Cnebba Iceling, Icel Eomæring, Eomær Angelþowing, Angelþeow Offing, Offa Wærmunding, Wærmund Wihtlæging, Wihtlæg Wodening.
758 actually 760
[n758.1] Her Cuþbryht arcebiscep forþferde.
759 actually 761
[n759.1] Her Bregowine wæs to ercebiscepe gehadod to Sancte Michaeles tide.
760 actually 762
Her Ęþelbryht Cantwara cyning forþferde hand8d: se was Wihtredes cinges sunu.
761 actually 763-4
Her wæs se micla winter.
763 actually 765
Her Ianbryht wæs gehadod to ærcebiscepe on þone feowertegan dæg ofer midne winter.
764 actually 766
Her Iaenbryht ærcebiscep onfeng pallium.
768 actually 770
hand8d: Her forþferde Eadberht Eating Cantwara cinc.
772 actually 774
Her Milred biscep forþferde.
773 actually 775
Her oþiewde read Cristesmęl on hefenum æfter sunnan setlgonge; 7 þy geare gefuhton Mierce 7 Cantware æt Ottanforda; 7 wunderleca nędran wæron gesewene on Suþseaxna londe.
777 actually 779
Her Cynewulf 7 Offa gefuhton ymb Benesingtun 7 Offa nam þone tuun.
780 actually 782
Her Aldseaxe 7 Francan gefuhtun.
784 actually 786
Her Cyneheard ofslog Cynewulf cyning, 7 he þær wearþ ofslægen, 7 .lxxxiiii. monna mid him; 7 þa onfeng Beorhtric Wesseaxna rices, 7 he ricsode .xvi. gear, 7 his lic liþ æt Werham, 7 his ryhtfędren cyn gęþ to Cerdice. hand8c: To þysan timan rixode Ealhmund cing innon Cent.
785 actually 787
Her wæs geflitfullic senoþ æt Cealchyþe, 7 Iaenbryht ærcebiscep forlet sumne dęl his biscepdomes, 7 from Offan kyninge Hygebryht wæs gecoren, 7 Ecgferþ to cyninge gehalgod.
787 actually 789
Her nom Beorhtric cyning Offan dohtor Eadburge; 7 on his dagum cuomon ærest .iii. scipu, 7 þa se gerefa þærto rad, 7 hie wolde drifan to þæs cyninges tune þy he nyste hwæt hie wæron; 7 hiene mon ofslog; Þæt wæron þa ærestan scipu Deniscra monna þe Angelcynnes lond gesohton.
790 actually 792
Her Iaenbryht ærcebiscep forþferde, 7 þy ilcan geare wæs gecoren Ęþelheard abbud to biscepe.
792 actually 794
Her Offa Miercna cyning het Ęþelbryhte rex þæt heafod ofaslean.
794 actually 796
Her Adrianus papa 7 Offa cyning forþferdon; 7 Ęþelred Norþanhymbra cyning wæs ofslægen from his agenre þeode, 7 Ceolwulf biscep 7 Eadbald biscep of þæm londe aforon; 7 Ecgferþ feng to Miercna rice. 7 þy ilcan geare forþferde; 7 Eadbryht onfeng rice on Cent. þam was oþer noma nemned Præn.
796 actually 798
Her Ceolwulf Miercna cyning oferhergeade Cantware oþ Mersc, 7 gefengun Praen hiera cyning, 7 gebundenne hine on Mierce lęddon;
797 actually 799
Her Romane Leone þæm papan his tungon forcurfon, 7 his eagan astungon, 7 hine of his setle afliemdon; 7 þa sona eft Gode fultomiendum he meahte geseon 7 sprecan, 7 eft was papa swa he ær wæs.
799 actually 801
Her Ęþelheard ærcebiscep 7 Cynebryht Wesseaxna biscep foron to Rome.
800 actually 802
Her Beorhtric cyning forþferde 7 Worr aldormon; 7 Ecgbryht feng to Wesseaxna rice; 7 þy ilcan dæge rad Ęþelmund aldorman of Hwiccium ofer æt Cynemæresforda, þa mette hine Weoxstan aldorman mid Wilsætum; þær wearþ micel gefeoht, 7 þær begen ofslægene þa aldormen, 7 Wilsætan namon sige.
802 actually 804
Her wæs gehadod Beornmod biscep to Hrofesceastre.
803 actually 805
Her Ęþelheard ærcebiscep forþferde, 7 Wulfred wæs to ærcebiscepe gehadod, 7 Forþred abbud forþferde.
804 actually 806
Her Wulfred ærcebiscep pallium onfeng.
805 actually 807
Her Cuþred cyning forþferde on Cantwarum, 7 Ceolburg abbudesse, 7 Heabryht aldorman.
812 actually 814
Her Carl cyning forþferde, 7 he ricsode .xlv. wintra. 7 Wulfred arcebiscep 7 Wigbryht Wesseaxna biscep foron begen to Rome;
813 actually 815
Her Wulfred ærcebiscep mid bledsunge þæs papan Leon hwearf eft to his agnum biscepdome; 7 þy geare gehergade Ecgbryht cyning on West Walas from easteweardum oþ westewearde.
814 actually 816
Her Leo se ęþela papa 7 se halga forþferde, 7 æfter him Stephanus feng to rice.
816 actually 818
Her Stephanus papa forþferde, 7 æfter him was Paschalis to papan gehadod; 7 þy ilcan geare forborn Ongolcynnes scolu.
819 actually 821
Her Cenwulf Miercna cyning forþferde, 7 Ceolwulf feng to rice, 7 Eadbryht aldormon forþferde.
821 actually 823
Her wearþ Ceolwulf his rices besciered.
822 actually 824
Her tuegen aldormen wurdon ofslægene, Burghelm 7 Muca; 7 senoþ wæs æt Clofeshoo.
823 actually 825
Her wæs Wala gefeoht 7 Defna æt Gafulforda 7 þy ilcan geare gefeaht Ecbryht cyning 7 Beornwulf cyning on Ellendune 7 Ecgbryht sige nam 7 þær wæs micel węl geslægen. Þa sende he Ęþlwulf his sunu of þære fierde 7 Ealhstan his biscep 7 Wulfheard his aldormon to Cent micle werede 7 hie Baldred þone cyning norþ ofer Temese adrifon 7 Cantware him to cirdon 7 Suþrige 7 Suþseaxe 7 Eastseaxe þy hie from his mægum ær mid unryhte anidde wærun 7 þy ilcan geare Eastengla cyning 7 seo þeod gesohte Ecgbryht cyning him to friþe 7 to mundboran for Miercna ege 7 þy geare slogon Eastengle Beornwulf Miercna cyning.
825 actually 827
Her Ludecan Miercna cyning 7 his .v. aldormen mon ofslog mid him 7 Wiiglaf feng to rice.
827 actually 829
Her mona aþistrode on middes wintres mæsseniht 7 þy ilcan geare geeode Ecgbryht cyning Miercna rice 7 al þæt be suþan Humbre wæs 7 he wæs se eahteþa cyning se þe Bretwalda wæs -- ærest Ęlle Suþseaxna cyning se þus micel rice hæfde se æftera wæs Ceawlin Wesseaxna cyning se þridda wæs Ęþelbryht Cantwara cyning se feorþa wæs Rędwald Eastengla cyning fifta was Eadwine Norþanhymbra cyning siexta wæs Oswald se æfter him ricsode seofoþa wæs Oswio Oswaldes broþur eahtoþa wæs Ecgbryht Wesseaxna cyning 7 se Ecgbryht lędde fierd to Dore wiþ Norþanhymbre 7 hie him þær eaþmedo budon 7 geþuærnesse 7 hie on þam tohwurfon.
828 actually 830
Her eft Wilaf onfeng Miercna rices 7 Ęþelwald biscep forþferde 7 þy ilcan geare lędde Ecgbryht cyning fierd on Norþwalas 7 he hie to eaþmodre hersumnesse gedyde.
829 actually 831
Her Wulfred ærcebiscep forþferde.
830 actually 832
Her Ceolnoþ wæs gecoren to biscepe 7 gehadod 7 Feologid abbud forþferde.
831 actually 833
Her Ceolnoþ ærcebiscep onfeng pallium.
832 actually 835
Her hęþne men oferhergeadon Sceapige.
833 actually 836
Her gefeaht Ecgbryht cyning wiþ .xxxv. sciphlæsta æt Carrum 7 þær wearþ micel węl geslægen, 7 þa Denescan ahton węlstowe gewald; 7 Hereferþ 7 Wigþen tuegen biscepas forþferdon, 7 Dudda 7 Osmod tuegen aldormen forþferdon.
835 actually 838
Her cuom micel sciphere on Westwalas 7 hie to anum gecierdon, 7 wiþ Ecgbryht Westseaxna cyning winnende wæron. Þa he þæt hierde 7 mid fierde ferde 7 him wiþ feaht æt Hengestdune 7 þær gefliemde ge þa Walas ge þa Deniscan.
836 actually 839
Her Ecgbryht cyning forþferde, 7 hine hæfde ær Offa Miercna cyning 7 Beorhtric Wesseaxna cyning afliemed .iii. gear of Angelcynnes lande on Fronclond, ær he cyning wære, 7 þy fultomode Beorhtric Offan þy he hæfde his dohtor him to cuene; 7 se Ecgbyht ricsode .xxxvii. wintra, .vii. monaþ, 7 feng Ęþelwulf Ecgbrehting to Wesseaxna rice, 7 he salde his suna Ęþelstane Cantwara rice 7 Eastseaxna 7 Suþrigea 7 Suþseaxna.
837 probably 840
Her Wulfheard aldormon gefeaht æt Hamtune wiþ .xxxiii. sciphlæsta 7 þær micel węl geslog 7 sige nom. 7 þy geare forþferde Wulfheard. 7 þy ilcan geare gefeaht Ęþelhelm dux wiþ Deniscne here on Port mid Dornsætum 7 gode hwile þone here gefliemde, 7 þa Deniscan ahton węlstowe gewald 7 þone aldormon ofslogon.
838 actually 841
Her Herebryht aldormon wæs ofslægen from hęþnum monnum 7 monige mid him on Merscwarum, 7 þy ilcan geare eft on Lindesse 7 on Eastenglum 7 on Cantwarum wurdon monige men ofslægene from þam herige.
839 actually 842
Her wæs micel węsliht on Lundenne 7 on Cwantawic 7 on Hrofesceastre.
840 probably 843
Her Ęþelwulf cyning gefeaht æt Carrum wiþ .xxxv. schiplæsta, 7 þa Deniscan ahton węstowe gewald.
845 probably 848
Her Eanulf aldorman gefeaht mid Sumursætum 7 Ealchstan biscep 7 Osric aldorman mid Dornsætum gefuhton æt Pedridan muþan wiþ Deniscne here 7 þær micel węl geslogon 7 sige namon. [*] þy ilcan geare Æþelstan rex 7 Ealchere dux micelne here ofslogon æt Sondwic on Kent 7 .viiii. scipu gefengon 7 þa oþru geflimdon
[*] Her Ceorl aldormon gefeaht wiþ hæþene men min Defenascire æt Wicganbeorge, 7 þær micel węl geslogon 7 sige namon. 7 þy ilcan geare Ęþelstan cyning 7 Ealchere dux micelne here ofslogon æt Sondwic on Cent 7 .ix .scipu gefengun 7 þa oþre gefliemdon. 7 hęþne men ærest ofer winter sæton. 7 þy ilcan geare cuom feorðe healf hund scipa on Temese muþan 7 bręcon Contwaraburg 7 Lundenburg, 7 gefliemdon Beorhtwulf Miercna cyning mid his fierde, 7 foron þa suþ ofer Temese on Suþrige 7 him gefeaht wiþ Ęþelwulf cyning 7 Ęþelbald his sunu æt Aclea mid Westseaxna fierde, 7 þær þæt mæste węl geslogon on hęþnum herige þe we secgan hierdon oþ þisne ondweardan dæg, 7 þær sige namon.
Her będ Burgred Miercna cyning 7 his wiotan (bædon) Ęþelwulf cyning þæt he (he) him gefultumade þæt him Norþwalas gehiersumade. He þa swa dyde, 7 mid fierde fór ofer Mierce on Norþwalas, 7 hie him alle gehiersume dydon. 7 þy ilcan geare sende Ęþelwulf cyning Ęlfred his sunu to Rome. Þa was domne Leo papa on Rome, 7 he hine to cyninge gehalgode 7 hiene him to biscepsuna nam. Þa þy ilcan geare Ealhere mid Cantwarum 7 Huda mid Suþrigium gefuhton on Tenet wiþ hęþnum herige 7 ærest sige namon, 7 þær wearþ monig mon ofslægen 7 adruncen on gehwęþere hond. On þæs ofer Eastron geaf Ęþelwulf cyning his dohtor Burgrede cyninge of Wesseaxum on Merce.
Her hęþne men ærest on Sceapige ofer winter sætun. 7 þy ilcan geare gebocude Ęþelwulf cyning teoþan dęl his londes ofer al his rice Go<de> to lofe 7 him selfum to ecere hęlo, 7 þy ilcan geare ferde to Rome mid micelre weorþnesse 7 þær was .xii. monaþ wuniende 7 þa him hamweard fór, 7 him þa Carl Francna cyning his dohtor geaf him to cuene, 7 æfter þam to his leodum cuom 7 hie þæs gefægene wærun. 7 ymb .ii. gear þæs ðe he on Francum com he gefór, 7 his lic liþ æt Wintanceastre, 7 he ricsode nigonteoþe healf gear. On se Ęþelwulf wæs Ecgbrehting, Ecgbryht Ealhmunding, Ealhmund Eafing, Eafa Eopping, Eoppa Ingilding; Ingild wæs Ines broþur Westseaxna cyninges, þæs þe eft ferde to Sancte Petre 7 þær eft his feorh gesealde; 7 hie wæron Cenredes suna, Cenred wæs Ceolwalding, Ceolwald Cuþaing, Cuþa Cuþwining, Cuþwine Ceaulining, Ceawlin Cynricing, Cynric Cerdicing, Cerdic Elesing, Elesa Esling, Esla Giwising, Giwis Wiging, Wig Freawining, Freawine Friþogaring, Friþogar Bronding, Brond Bęldæging, Bęldæg Wodening, Woden Friþowalding, Friþuwald Freawining, Frealaf Friþuwulfing, Friþuwulf Finning, Fin Godwulfing, Godwulf Geating, Geat Tętwaing, Tętwa Beawing, Beaw Sceldwaing, Sceldwea Heremoding, Heremod Itermoning, Itermon Hraþraing, se wæs geboren in þære earce: Noe, Lamach, Matusalem, Enoh, Iaered, Maleel, Camon, Enos, Sed, Adam primus homo et pater noster est Christus, Amen. On þa fengon Ęþelwulfes suna twegen to rice, Ęþelbald to Wesseaxna rice 7 Ęþelbryht to Cantwara rice 7 to Eastseaxna rice 7 to Suþrigea 7 to Suþseaxna rice; 7 þa ricsode Ęþelbald .v. gear.
Her Ęþelbald cyng forþferde, 7 his lic liþ æt Sciraburnan, 7 feng Ęþelbrht to allum þam rice his broþur, 7 he hit heold on godre geþuærnesse 7 on micel<r>e sibsumnesse; 7 on his dæge cuom micel sciphere hand1b: up 7 abręcon Wintanceastre. 7 wiþ þone here gefuhton Osric aldorman mid Hamtunscire, 7 Ęþelwulf aldormon mid Bearrucscire, 7 þone here gefliemdon, 7 węlstowe gewald ahton; 7 se Ęþelbryht ricsode .v. gear, 7 his lic liþ æt Scireburnan.
Her sæt hęþen here on Tenet, 7 genamon friþ wiþ Cantwarum, 7 Cantware him feoh geheton wiþ þam friþe, 7 under þam friþe 7 þam feohgehate se here hiene on niht up bestęl, 7 oferhergeade alle Cent eastewearde;
Her feng Ęþered Ęþelbryhtes broþur to Wesseaxna rice; 7 þy ilcan geare cuom micel here on Angelcynnes lond, 7 wintersetl namon on Eastenglum, 7 þær gehorsude wurdon, 7 hie him friþ <wiþ> namon.
Her for se here of Eastenglum ofer Humbre muþan to Eoforwicceastre on Norþhymbre, 7 þær wæs micel ungeþuærnes þære þeode betweox him selfum, 7 hie hæfdun hiera cyning aworpenne Osbryht, 7 ungecyndne cyning underfengon Ęllan; 7 hie late on geare to þam gecirdon þæt hie wiþ þone here winnende wærun, 7 hie þeah micle fierd gegadrodon, 7 þone here sohton æt Eoforwicceastre, 7 on þa ceastre bręcon, 7 hie sume inne wurdon, 7 þær was ungemetlic węl geslægen Norþanhymbra, sume binnan, sume butan; 7 þa cyningas begen ofslægene, 7 sio laf wiþ þone here friþ nam; 7 þy ilcan geare gefor Ealchstan biscep, 7 he hæfde þæt bisceprice .l. wintra æt Scireburnan, 7 his lic liþ þær on tune.
Her for se ilca here innan Mierce to Snotengaham, 7 þær wintersetl namon; 7 Burgręd Miercna cyning 7 his wiotan będon Ęþered Westseaxna cyning 7 Ęlfred his broþur þæt hie him gefultumadon , þæt hie wiþ þone here gefuhton; 7 þa ferdon hie mid Wesseaxna fierde innan Mierce oþ Snotengaham, 7 þone here þær metton on þam geweorce, 7 þær nan hefelic gefeoht ne wearþ, 7 Mierce friþ namon wiþ þone here;
Her for se here eft to Eoforwicceastre, 7 þær sæt .i. gear.
Her rad se here ofer Mierce innan Eastengle 7 wintersetl namon æt Þeodforda, 7 þy wintra Eadmund cyning him wiþ feaht, 7 þa Deniscan sige namon, 7 þone cyning ofslogon, 7 þæt lond all geeodon; 7 þy geare gefor Ceolnoþ ærcebiscep. hand7a: 7 Æþered Wiltunscire biscop wearþ gecoren to ærcebisc<o>pe to Cantuareberi.
Her cuom se here to Readingum on Westseaxe, 7 þæs ymb .iii. niht ridon .ii. eorlas up; Þa gemette hie Ęþelwulf aldorman on Englafelda, 7 him þær wiþ gefeaht 7 sige nam; Þæs ymb .iiii. niht Ęþered cyning 7 Ęlfred his broþur þær micle fierd to Readingum gelęddon, 7 wiþ þone here gefuhton, 7 þær wæs micel węl geslægen on gehwęþre hond, 7 Ęþelwulf aldormon wearþ ofslægen, 7 þa Deniscan ahton węlstowe gewald; 7 þæs ymb .iiii. niht gefeaht Ęþered cyning 7 Ęlfred his broþur wiþ alne þone here on Æscesdune, 7 hie wærun on twæm gefylcum, on oþrum wæs Bachsecg 7 Halfdene þa hęþnan cyningas, 7 on oþrum wæron þa eorlas; 7 þa gefeaht se cyning Ęþered wiþ þara cyninga getruman, 7 þær wearþ se cyning Bagsecg ofslægen; 7 Ęlfred his broþur wiþ þara eorla getruman, 7 þær wearþ Sidroc eorl ofslægen se alda, 7 Sidroc eorl se gioncga, 7 Osbearn eorl, 7 Fræna eorl, 7 Hareld eorl, 7 þa hergas begen gefliemde, 7 fela þusenda ofslægenra, 7 onfeohtende wæron oþ niht. 7 þæs ymb .xiiii. niht gefeaht Ęþered cyning 7 Ęlfred his broður wiþ þone here æt Basengum, 7 þær þa Deniscan sige namon; 7 þæs ymb .ii. monaþ gefeaht Ęþered cyning 7 Ęlfred his broþur wiþ þone here æt Meretune, 7 hie wærun on tuæm gefylcium, 7 hie butu gefliemdon, 7 longe on dæg sige ahton, 7 þær wearþ micel węlsliht on gehwęþere hond, 7 þa Deniscan ahton węlstowe gewald; 7 þær wearþ Heahmund biscep ofslægen, 7 fela godra monna; 7 æfter þissum gefeohte cuom micel sumorlida; 7 þæs ofer Eastron gefor Ęþered cyning, 7 he ricsode .v. gear, 7 his lic liþ æt Winburnan. Þa feng Ęlfred Ęþelwulfing his broþur to Wesseaxna rice; 7 þæs ymb anne monaþ gefeaht Ęlfred cyning wiþ alne þone here lytle werede æt Wiltune, 7 hine longe on dæg gefliemde, 7 þa Deniscan ahton węlstowe gewald; 7 þæs geares wurdon .viiii. folc gefeoht gefohten wiþ þone here on þy cynerice be suþan Temese, 7 butan þam þe him Ęlfred þæs cyninges broþur, 7 anlipig aldormon, 7 cyninges þegnas oft rade onridon þe mon na ne rimde, 7 þæs geares wærun ofslægene .viiii. eorlas 7 an cyning; 7 þy geare namon Westseaxe friþ wiþ þone here.
Her for se here to Lundenbyrig from Readingum, 7 þær wintersetl nam, 7 þa namon Mierce friþ wiþ þone here.
Her for se here on Norþhymbre, 7 he nam wintersetl on Lindesse æt Tureces iege, 7 þa namon Mierce friþ wiþ þone here.
Her for se here from Lindesse to Hreopedune, 7 þær wintersetl nam, 7 þone cyning Burgręd ofer sę adræfdon ymb .xxii. wintra þæs þe he rice hæfde, 7 þæt lond all geeodon; 7 he for to Rome 7 þær gesæt 7 his lic liþ on Sancta Marian ciricean on Angelcynnes scole; 7 þy ilcan geare hie sealdon anum unwisum cyninges þegne Miercna rice to haldanne, 7 he him aþas swor 7 gislas salde, þæt he him gearo wære swa hwelce dæge swa hie hit habban wolden, 7 he gearo wære mid him selfum, 7 on allum þam þe him læstan woldon to þæs heres þearfe.
Her for se here from Hreopedune, 7 Healfdene for mid sumum þam here on Norþhymbre. 7 nam wintersetl be Tinan þære ea, 7 se here þæt lond geeode. 7 oft Hergade on Peohtas, 7 on Stręcledwalas; 7 for Godrum 7 Oscytel 7 Anwynd. þa .iii. cyningas, of Hreopedune to Grantebrycge mid micle here, 7 sæton þær an gear; 7 þy sumera for Ęlfred cyning ut on sę mid sciphere, 7 gefeaht wiþ .vii. sciphlæstas, 7 hiera an gefeng. 7 þa oþru gefliemde.
Her hiene bestęl se here into Werham Wesseaxna fierde, 7 wiþ þone here se cyning friþ nam, 7 him þa aþas sworon on þam halgan beage, þe hie ær nanre þeode noldon, þæt hie hrędlice of his rice foren; 7 hie þa under þam hie nihtes bestęlon þære fierde se gehorsoda here into Escanceaster; 7 þy geare Healfdene Norþanhymbra lond gedęlde. 7 ergende wæron 7 hiera tilgende.
Her cuom se here into Escanceastre from Werham, 7 se sciphere sigelede west ymbutan, 7 þa mette hie micel yst on sę, 7 þær forwearþ .cxx. scipa æt Swanawic; 7 se cyning Ęlfred æfter þam gehorsudan here mid fierde rad oþ Exanceaster 7 hie hindan ofridan ne meahte ær hie on þam fæstene wæron, þær him mon to ne meahte; 7 hie him þær foregislas saldon. swa fela swa he habban wolde, 7 micle aþas sworon, 7 þa godne friþ heoldon; 7 þa on hærfæste gefor se here on Miercna lond, 7 hit gedældon sum, 7 sum Ceolwulfe saldon.
Her hiene bestęl se here on midne winter ofer tuel<f>tan niht to Cippanhamme, 7 geridon Wesseaxna lond 7 gesæton <7> micel þæs folces (7) ofer sę adræfdon, 7 þæs oþres þone mæstan dęl hie geridon, 7 him to gecirdon buton þam cyninge Ęlfrede. 7 he lytle werede unieþelice æfter wudum for, 7 on morfæstenum; 7 þæs ilcan wintra wæs Inwæres broþur 7 Healfdenes on Westseaxum on Defenascire mid .xxiii. scipum, 7 hiene mon þær ofslog, 7 .dccc. monna mid him. 7 .xl. monna his heres; 7 þæs on Eastron worhte Ęlfred cyning lytle werede geweorc æt Ęþelingaeigge, 7 of þam geweorce was winnende wiþ þone here, 7 Sumursætna se dęl, se þær niehst wæs; Þa on þære seofoðan wiecan ofer Eastron he gerad to Ecgbryhtes stane be eastan Sealwyda, 7 him to com(m)an þær ongen Sumorsæte alle, 7 Wilsætan, 7 Hamtunscir se dęl, se hiere behinon sę was, 7 his gefægene wærun; 7 he for ymb ane niht of þam wicum to Iglea, 7 þæs ymb ane to Eþandune, 7 þær gefeaht wiþ alne þone here, 7 hiene gefliemde, 7 him æfter rad oþ þæt geweorc, 7 þær sæt .xiiii. niht; 7 þa salde se here him foregislas 7 micle aþas þæt hie of his rice uuoldon 7 him eac geheton þæt hiera kyning fulwihte onfon wolde 7 hie þæt gelæston swa, 7 þæs ymb .iii. wiecan com se cyning to him Godrum þritiga sum þara monna þe in þam here weorþuste wæron æt Alre, 7 þæt is wiþ Ęþelinggaeige; 7 his se cyning þær onfeng æt fulwihte, 7 his crismlising was æt Weþmor, 7 he was .xii. niht mid þam cyninge, 7 he hine miclum 7 his geferan mid feo weorðude.
Her for se here to Cirenceastre of Cippanhamme. 7 sæt þær an gear; 7 þy geare gegadrode on hloþ wicenga, 7 gesæt æt Fullanhamme be Temese; 7 þy ilcan geare aþiestrode sio sunne ane tid dæges.
Her for se here of Cirenceastre on Eastengle, 7 gesæt þæt lond, 7 gedęlde. 7 þy ilcan geare for se here ofer sę þe ær on Fullanhomme sæt on Fronclond to Gend, 7 sæt þær an gear.
Her for se here ufor on Fronclond, 7 þa Francan him wiþ gefuhton, 7 þær þa wearþ se here gehorsod æfter þam gefeohte.
Her for se here up onlong Mæse feor on Fronclond, 7 þær sæt an gear. 7 þy ilcan geare for Ęlfred cyning mid scipum ut on sę. 7 gefeaht wiþ feower sciphlæstas Deniscra monna, 7 þara scipa tu genam, 7 þa men ofslægene wæron þe ðęron wæron, 7 tuegen scipheras him on hond eodon, 7 þa wæron miclum forslægene 7 forwundode ær hie on hond eodon.
Her for se here up on Scald to Cundoþ, 7 þær sæt an gear.
Her for se here up on Sunnan to Embenum, 7 þær sæt an gear.
Her todęlde se foresprecena here on tu, oþer dęl east. oþer dęl to Hrofesceastre; 7 ymbsæton ða ceastre, 7 worhton oþer fæsten ymb hie selfe. 7 hie þeah þa ceastre aweredon oþþæt Ęlfred com utan mid fierde; Þa eode se here to hiera scipum, 7 forlet þæt geweorc. 7 hie wurdon þær behorsude, 7 sona þy ilcan sumere ofer sę gewiton; 7 þy ilcan geare sende Ælfred cyning sciphere on Eastengle; sona swa hie comon on Stufe muþan, þa metton hie .xvi. scipu wicenga, 7 wiþ ða gefuhton, 7 þa scipo alle geręhton, 7 þa men ofslogon; Þa hie þa hamweard wendon mid þære herehyþe, þa metton hie micelne sciphere wicenga, 7 þa wiþ þa gefuhton þy ilcan dæge, 7 þa Deniscan ahton sige; Þy ilcan geare ær middum wintra forþferde Carl Francna cyning, 7 hiene ofslog an efor, 7 ane geare ær his broður forþferde, se hæfde eac þæt westrice, 7 hie wæron begen Hloþwiges suna. Se hæfde eac þæt westrice, 7 forþferde þy geare þe sio sunne aþiestrode. Se wæs Karles sunu þe Ęþelwulf Westseaxna cyning his dohtor hæfde him to cuene. 7 þy ilcan geare gegadrode micel sciphere on Aldseaxum, 7 þær wearþ micel gefeoht tua on geare, 7 þa Seaxan hæfdun sige, 7 þær wæron Frisan mid. Þy ilcan geare feng Carl to þam westrice, 7 to allum þam westrice behienan Wendelsę, 7 begeondan þisse sę, swa hit his þridda fęder hæfde, butan Lidwiccium. Se Carl was Hloþwiges sunu, se Hloþwig was Carles broþur, se wæs Iuþyttan fęder þe Ęþelwulf cyning hæfde, 7 hie wæron Hloþwiges suna, se Hloþwig was þæs aldan Carles sunu, se Carl was Pippenes sunu. 7 þy ilcan geare forþferde se goda papa Marinus, se gefreode Ongelcynnes scole be Ęlfredes bene Westseaxna cyninges, 7 he sende him micla gifa, 7 þære rode dęl þe Crist on þrowude. 7 þy ilcan geare se here on Eastenglum bręc friþ wiþ Ęlfred cyning.
Her for se here eft west þe ær east gelende, 7 þa up on Sigene, 7 þær wintersetl namon. Þy ilcan geare gesette Ęlfred cyning Lundenburg, 7 him all Angelcyn to cirde, þæt buton Deniscra monna hæftniede was, 7 hie þa befæste þa burg Ęþerede aldormen to haldonne.
Her for se here up þurh þa brycge æt Paris, 7 þa up andlang Sigene oþ Mæterne, oþ Cariei; 7 þa sæton þara 7 innan Ionan tu winter on þam twam stedum; 7 þy ilcan geare forþferde Karl Francna cyning, 7 Earnulf his broþur sunu hine .vi. wicum ær he forþferde beręd<d>e æt þæm rice, 7 þa wearþ þæt rice todęled on .v. 7 .v. kyningas to gehalgode. Þæt wæs þeah mid Earnulfes geþafunge, 7 hi cuędon þæt hie þæt to his honda healdan sceoldon. forþæm hira nan næs on fędren healfe to geboren. buton him anum. Earnulf þa wunode on þęm londe be eastan Rin, 7 Roþulf þa feng to þæm middelrice, 7 Oda to þæm westdæle, 7 Beorngar 7 Wiþa to Longbeardna londe, 7 to þæm londum on þa healfe muntes, 7 þæt heoldun mid micelre unsibbe, 7 tu folcgefeoht gefuhton, 7 þæt lond oft 7 gelome forhergodon, 7 æghwęþer oþerne oftrędlice ut dræfde; 7 þy ilcan geare þe se here for forþ up ofer þa brycge æt Paris. (7) Æþelhelm aldormon lędde Wesseaxna ęlmessan 7 Ęlfredes cyninges to Rome. [n887.4]
Her lędde Beocca aldormon Wesseaxna ęlmessan 7 Ęlfredes cyninges to Rome. 7 Ęþelswiþ cuen, sio wæs Ęlfredes sweostor cyninges, forþferde, 7 hire lic liþ æt Pafian; 7 þy ilcan geare Ęþered ercebiscep 7 Ęþelwold aldormon. forþferdon on anum monþe.
[n889.1] On þissum geare næs nan fęreld to Rome, buton tuegen hleaperas Ęlfred cyning sende mid gewritum.
Her lędde Beornhelm abbud Westseaxna ęlmessan to Rome 7 Ęlfredes cyninges; 7 Godrum se norþerna cyning forþferde, þæs fulluhtnama wæs Ęþelstan, se wæs Ęlfredes cyninges godsunu, 7 he bude on Eastenglum, 7 þæt lond ærest gesæt; 7 þy ilcan geare for se here of Sigene to Sant Laudan, þæt is betueoh Brettum 7 Francum, 7 Brettas him wiþ gefuhton, 7 hæfdon sige, 7 hie bedrifon ut on ane ea, 7 monige adrencton. hand7a: Her wæs Plegemund gecoron of Gode 7 of eallen his halechen.
Her for se here east. 7 Earnulf cyning gefeaht wið ðæm rędehere ær þa scipu cuomon, mid Eastfrancum, 7 Seaxum, 7 Bægerum. 7 hine gefliemde; 7 þrie Scottas comon to Ęlfrede cyninge, on anum bate butan ęlcum gereþrum of Hibernia, þonon hi hi bestęlon forþon þe hi woldon for Godes lufan on elþiodignesse beon, hi ne rohton hwær. Se bat wæs geworht of þriddan healfre hyde þe hi on foron, 7 hi namon mid him þæt hi hæfdun to seofon nihtum mete; 7 þa comon hie ymb .vii. niht to londe on Cornwalum. 7 foron þa sona to Ęlfrede cyninge; Þus hie wæron genemnde, Dubslane 7 Maccbethu. 7 Maelinmun. 7 Swifneh se betsta lareow þe on Scottum wæs gefor.
(892) actually a continuation of 891
[*]7 þy ilcan geare ofer Eastron. ymbe gang dagas oþþe ær, æteowde se steorra þe mon on boclæden hæt cometa, sume men cweþaþ on Englisc þæt hit sie feaxede steorra. forþæm þær stent lang leoma of, hwilum on ane healfe, hwilum on ælce healfe.
[n892.1] Her on þysum geare for se micla here. þe we gefyrn ymbe spræcon, eft of þæm eastrice westweard to Bunann [n892.2] . 7 þær wurdon gescipode, swa þæt hie asettan him on anne siþ ofer mid horsum mid ealle, 7 þa comon up on Limene muþan. mid .ccl. (hunde) scipa. Se muþa is on easte weardre Cent [n892.3] æt þæs miclam wuda eastende þe we Andred hatað; se wudu is eastlang 7 westlang hund twelftiges mila lang oþþe lengra, 7 þritiges mila brad; seo ea þe we ær ymbe spræcon lið ut of þæm wealda; On þa ea hi tugon up hiora scipu oþ þone weald .iiii. mila fram þæm muþan uteweardum. 7 þær abræcon an geweorc inne on þæm fenne sæton feawa cirlisce men on, 7 wæs samworht. Þa sona æfter þæm com Hæsten mid .lxxx. scipa up on Temese muðan, 7 worhte him geweorc æt Middeltune, 7 se oþer here æt Apuldre.
[n893.1] On þys geare, þæt wæs ymb twelf monað þæs þe hie on þæm eastrice geweorc geworht hæfdon, Norþhymbre 7 Eastengle hæfdon Ælf(f)rede cyninge aþas geseald, 7 Eastengle foregisla .vi. 7 þeh ofer þa treowa, swa oft swa þa oþre hergas mid ealle herige ut foron, þonne foron hie, oþþe mid, oþþe on heora healfe an [n893.2] . Þa gegaderade Ælfred cyning his fierd, 7 for þæt he gewicode betwuh þæm twam hergum. þær þær he niehst rymet hæfde for wudufæstenne ond for wæterfæstenne swa þæt he mehte ægþerne geræcan gif hie ænigne feld secan wolden; Þa foron hie siþþan æfter þæm wealda hloþum 7 flocradum. bi swa hwaþerre efes swa hit þonne fierdleas wæs. 7 hi(m) mon eac mid oþrum floccum sohte mæstra daga ælce, oþþe on niht. ge of þære fierde, ge eac of þæm burgum; Hæfde se cyning his fierd on tu [n893.3] tonumen, swa þæt hie wæron simle healfe æt ham, healfe ute, butan þæm monnum þe þa burga healdan scolden. Ne com se here oftor eall ute of þæm setum þonne tuwwa. oþre siþe þa hie ærest to londe comon, ær sio fierd gesamnod wære, oþre siþe þa hie of þæm setum faran woldon; Þa hie gefengon micle herehyð, 7 þa woldon ferian norþweardes ofer Temese in on Eastseaxe ongean þa scipu. Þa forrad sio fierd hie foran, 7 him wið gefeaht æt Fearnhamme, 7 þone here gefliemde, 7 þa herehyþa ahreddon, 7 hie flugon ofer Temese buton ælcum forda þa up be Colne on anne iggað. Þa besæt sio fierd hie þær utan þa hwile þe hie þær lengest mete hæfdon. Ac hie hæfdon þa heora stemn gesetenne, 7 hiora mete genotudne, 7 wæs se cyng þa þiderweardes on fære mid þære scire [n893.4] þe mid him fierdedon; Þa he þa wæs þiderweardes, 7 sio oþeru fierd wæs hamweardes, 7 ða Deniscan sæton þær behindan, forþæm hiora cyning wæs gewundod on þæm gefeohte, þæt hi hine ne mehton ferian; Þa gegaderedon þa þe in Norþhymbrum bugeað, 7 on Eastenglum, sum hund scipa, 7 foron suð ymbutan, 7 sum feowertig scipa norþ ymbutan, 7 ymbsæton an geweorc on Defnascire be þære norþsæ [n893.5] ; 7 þa þe suð ymbutan foron. ymbsæton Exancester. Þa se cyng þæt hierde, þa wende he hine west wið Exanceastres mid ealre [n893.6] þære fierde, buton swiþe gewaldenum dæle easteweardes þæs folces. Þa foron forð oþþe hie comon to Lundenbyrg, 7 þa mid þæm burgwarum 7 þæm fultume þe him westan com, foron east to Beamfleote; Wæs Hæsten þa þær cumen mid his herge, þe ær æt Middeltune sæt. 7 eac se micla here wæs þa þærto cumen, þe ær on Limene muþan sæt æt Apuldre; Hæfde [n893.7] Hæsten ær geworht þæt geweorc æt Beamfleote, 7 wæs þa ut afaren on hergaþ, 7 wæs se micla here æt ham; Þa foron hie to 7 gefliemdon þone here, 7 þæt geweorc abræcon, 7 genamon eal þæt þær binnan wæs, ge on feo. ge on wifum, ge eac on bearnum, 7 brohton eall into Lundenbyrig, 7 þa scipu eall oðþe tobræcon, oþþe forbærndon, oþþe to Lundenbyrig brohton oþþe to Hrofesceastre. 7 Hæstenes wif 7 his suna twegen mon brohte to þæm cyninge, 7 he hi him eft ageaf, forþæm þe hiora wæs oþer [n893.8] his godsunu, oþer Æðeredes ealdormonnes; Hæfdon hi hiora onfangen ær Hæsten to Beamfleote come, 7 he him hæfde geseald gislas 7 aðas, 7 se cyng him eac wel feoh sealde, 7 eac swa þa he þone cniht agef 7 þæt wif. Ac sona swa hie to B(l)eamfleote comon, 7 þæt geweorc (ge)gewor<h>t [n893.9] wæs. swa hergode he on [n893.10] his rice þone ilcan ende þe æþered his cumpæder healdan sceolde, 7 eft oþre siþe he wæs on hergað gelend on þæt ilce rice þa þa mon his geweorc abræc. Þa se cyning hine þa west wende mid þære fierde wið Exancestres, swa ic ær sæde, 7 se here þa burg beseten [n893.11] hæfde; Þa he þærto gefaren wæs, þa eodon hie to hiora scipum. Þa he þa wið þone here þær wæst abisgod wæs, 7 þa hergas wæron þa gegaderode begen to Sceobyrig on Eastseaxum, 7 þær geweorc worhtun. Foron begen ætgædere up be Temese, 7 him com micel eaca to. ægþer ge of Eastenglum, ge of Norþhymbrum. Foron þa up be Temese oþþæt hie gedydon æt Sæferne, þa up be Sæferne. Þa gegaderode Æþered ealdormon, 7 Æþelm ealdorman. 7 Æþelnoþ ealdorman, 7 þa cinges þegnas þe þa æt ham æt þæm geweorcum wæron, of ælcre byrig be eastan Pedredan, ge be westan Sealwuda ge be eastan, ge eac be norþan Temese, 7 be westan Sæfern, ge eac sum dæl þæs Norðwealcynnes. Þa hie þa ealle gegaderode wæron, þa offoron hie þone here hindan æt Buttingtune on Sæferne staþe, 7 hine þær utan besæton on ælce healfe, on anum fæstenne. Þa hie ða fela wucena sæton on twa healfe þær e, 7 se cyng wæs west [n893.12] on Defnum wiþ þone sciphere, þa wæron hie mid metelieste gewægde, 7 hæfdon miclne dæl þara horsa freten. 7 þa oþre wæron hungre acwolen. Þa eodon hie ut to ðæm monnum þe on easthealfe þære e wicodon, 7 him wiþ gefuhton, 7 þa Cristnan hæfdon sige; 7 þær wearð Ordheh cyninges þegn ofslægen, 7 eac monige oþre cyninges þegnas [n893.13] , ofslægen, 7 se dæl þe þær aweg com wurdon on fleame generede. Þa hie on Eastseaxe comon to hiora geweorce. 7 to hiora scipum. þa gegaderade sio laf eft of Eastenglum, 7 of [*]Norðhymbrum micelne here onforan winter 7 befæston hira wif, 7 hira scipu, 7 hira feoh on Eastenglum, 7 foron anstreces dæges 7 nihtes, þæt hie gedydon on anre westre ceastre on Wirhealum, seo is Legaceaster gehaten; Þa ne mehte seo fird hie na hindan offaran, ær hie wæron inne on þæm geweorce; Besæton þeah þæt geweorc utan sume twegen dagas, 7 genamon ceapes eall þæt þær buton wæs, 7 þa men ofslogon þe hie foran forridan mehton butan geweorce, 7 þæt corn eall forbærndon, 7 mid hira horsum fretton on ælcre efenehðe. 7 þæt wæs ymb twelf monað þæs þe hie ær hider ofer sæ comon.
[n894.1] ONd [n894.2] þa sona æfter þæm on ðys gere for se here of Wirheale in on Norðwealas, forþæm hie ðær sittan ne mehton; þæt wæs forðy þe hie wæron benumene ægðer ge þæs ceapes, ge þæs cornes, ðe hie gehergod hæfdon; Þa hie ða eft ut of Norðwealum wendon mid þære herehyðe þe hie ðær genumen hæfdon, þa foron hie ofer Norðhymbra lond 7 Eastengla, swa swa seo fird hie geræcan ne mehte, oþþæt hie comon on Eastseaxna lond easteweard, on an igland þæt is ute on þære sæ, þæt is Meresig haten. 7 þa se here eft hamweard wende þe Exanceaster beseten hæfde, þa hergodon hie up on Suðseaxum neah Cisseceastre, 7 þa burgware hie gefliemdon, 7 hira monig hund ofslogon, 7 hira scipu sumu genamon. Ða þy ilcan gere onforan winter þa Deniscan þe on Meresige sæton tugon hira scipu up on Temese, 7 þa up on Lygan; þæt wæs ymb twa ger þæs þe hie hider ofer sæ comon.
[n895.1] On þy ilcan gere worhte se foresprecena here geweorc be Lygan .xx. mila bufan Lundenbyrig. Þa þæs on sumera foron micel dæl þara burgwara, 7 eac swa oþres folces, þæt hie gedydon æt þara Deniscana geweorce, 7 þær wurdon gefliemde, 7 sume feower cyninges þegnas ofslægene. Þa þæs on hærfeste þa wicode se cyng on neaweste þære byrig, þa hwile þe hie hira corn gerypon, þæt þa Deniscan him ne mehton þæs ripes forwiernan. Þa sume dæge rad se cyng up bi þære eæ, 7 gehawade hwær mon mehte þa ea forwyrcan, þæt hie ne mehton þa scipu ut brengan. 7 hie ða swa dydon, worhton ða tu geweorc on twa healfe þære eas. Þa hie ða þæt geweorc furþum ongunnen hæfdon, 7 þærto gewicod hæfdon þa onget se here þæt hie ne mehton þa scipu ut brengan; Þa forleton hie hie, 7 eodon ofer land þæt hie gedydon æt Cwatbrycge be Sæfern, 7 þær gewerc worhton. Þa rad seo fird west æfter þæm herige, 7 þa men of Lundenbyrig gefetedon þa scipu, 7 þa ealle þe hie alædan ne mehton tobræcon, 7 þa þe þær stælwyrðe wæron binnan Lundenbyrig gebrohton; 7 þa Deniscan hæfdon hira wif befæst innan Eastengle ær hie ut of þæm geweorce foron; Þa sæton hie þone winter æt Cwatbrycge. Þæt wæs ymb þreo ger þæs þe hie on Limene muðan comon hider ofer sæ.
[n896.1] Ða þæs on sumera on ðysum gere tofor se here, sum on Eastengle, sum on Norðhymbre, 7 þa þe feohlease wæron him þær scipu begeton, 7 suð ofer sæ foron to Sigene. Næfde se here, Godes þonces, Angelcyn ealles forswiðe gebrocod; Ac hie wæron micle swiþor gebrocede on þæm þrim gearum mid ceapes cwilde 7 monna, ealles swiþost mid þæm þæt manige þara selestena cynges þena þe þær on londe wæron forðferdon on þæm þrim gearum; Þara wæs sum Swiðulf biscop on Hrofesceastre, 7 Ceolmund ealdormon on Cent, 7 Beorhtulf ealdormon on Eastseaxum, 7 Wulfred ealdormon on Hamtunscire, 7 Ealhheard biscop æt Dorceceastre, 7 Eadulf cynges þegn on Suðseaxum [n896.2] , 7 Beornulf wicgefera on Winteceastre, 7 Ecgulf cynges horsþegn, 7 manige eac him þeh ic ða geðungnestan nemde. Þy ilcan geare drehton þa hergas on Eastenglum 7 on Norðhymbrum Westseaxna lond swiðe be þæm suðstæðe mid stælhergum, ealra swiþust mid ðæm æscum þe hie fela geara ær timbredon. Þa het Ælfred cyng timbran langscipu ongen ða æscas; þa wæron fulneah tu swa lange [n896.3] swa þa oðru. Sume hæfdon .lx. ara. sume ma. Þa wæron ægðer ge swiftran ge unwealtran, ge eac hieran þonne þa oðru; næron nawðer ne on Fresisc gescæpene ne on Denisc, bute swa him selfum ðuhte þæt hie nytwyrðoste beon meahten. Þa æt sumum cirre þæs ilcan geares comon þær sex scipu to Wiht, 7 þær micel yfel gedydon, ægðer ge on Defenum ge welhwær be ðæm særiman. Þa het se cyng faran mid nigonum to þara niwena scipa, 7 forforon him þone muðan foran on utermere; Þa foron hie mid