.

The Common Stock

The Anglo-Saxon Chronicle: An Electronic Edition (Vol 10) literary edition

[Introduction]

ÞY GEARE ÞE WÆS AGAN fram Cristes acennesse .cccc. wintra 7 .xciiii. uuintra, þa Cerdic 7 Cynric his sunu cuom up æt Cerdicesoran mid .v. scipum; 7 se Cerdic wæs Elesing, Elesa Esling, Esla Gewising, Giwis Wiging, Wig Freawining, Freawine Friþugaring, Friþugar Bronding, Brond Bęldæging, Bęldæg Wodening. Ond þæs ymb .vi. gear þæs þe hie up cuomon geeodon Westseaxna rice, 7 þæt uuærun þa ærestan cyningas þe Westseaxna lond on Wealum geeodon; 7 he hæfde þæt rice .xvi. gear, 7 þa he gefor, þa feng his sunu Cynric to þam rice 7 heold [intro.1] .xxvi. winter. þa he forðferde þa feng Ceawlin to, his sunu, 7 heold .xvii. gear. Þa he gefor, þa feng Ceol to þam rice 7 heold .vi. gear. Þa he gefor, þa feng Ceolwulf to, his broþur, 7 he ricsode .xvii. gear, 7 hiera cyn gęþ to Cerdice. Þa feng Cynegils, Ceolwulfes broþur sunu, to rice 7 ricsode [intro.2] .xx. wintra, 7 he onfeng ærest fulwihte Wesseaxna cyninga, 7 þa feng Cenwalh to 7 heold .xxxi. wintra, 7 se Cenwalh wæs Cynegilses sunu; 7 þa heold Seaxburg his cuen an gear þæt rice æfter him. þa feng Æscwine to rice, þæs cyn gęþ to Cerdice, 7 heold .ii. gear. Þa feng Centwine to Wesseaxna rice Cynegilsing 7 ricsode .vii. gear. þa feng Ceadwalla to þam rice, þæs cyn gęþ to Cerdice, 7 heold .iii. gear. Ða feng Ine to Seaxna rice, þęs cyn gęþ to Ceardice, 7 heold .xxxvii. wintra. Þa feng Ęþelheard to, þæs cyn gęþ to Ceardice, 7 heold [intro.3] .xiiii. winter. [intro.4] Þa feng Cuþred to, þæs cyn gęþ to Cerdice, 7 heold .xvii. gear. Þa feng Sigebryht to, þæs cyn gęþ to Cerdice, 7 heold an gear. Þa feng Cynewulf to rice, þæs cyn gęþ to Ceardice, 7 heold .xxxi. wintra. Þa feng Beorhtric to rice, þæs cyn gęþ to Cerdice, 7 heold .xvi. gear. Þa feng Ecgbryht to þam rice 7 heold .xxxvii. wintra 7 .vii. monaþ; 7 þa feng Ęþelwulf his sunu to 7 heold nigonteoðe healf gear. Se Ęþelwulf wæs Ecgbryhting, Ecgbryht Ecgbryhting, Ecgbryht Ealhmunding, Ealhmund Eafing, Eafa Eopping, Eoppa Ingilding, Ingild Cenreding, 7 Ine Cenreding 7 Cuþburg Cenreding 7 Cuenburg Cenreding, Cenred Ceolwalding, Ceolwald Cuþwulfing, Cuþwulf Cuþwining, Cuþwine Celming, Celm Cynricing, Cynric Creoding, Creoda Cerdicing. Ond þa feng Ęþelbald his sunu to rice 7 heold .v. gear. Þa feng Ęþelbryht his broþur to 7 heold .v. gear. [intro.5] Þa feng Ęþered hiera broþur to rice, 7 heold .v. gear. Þa feng Ęlfred hiera broþur to [intro.6] rice, 7 þa was agan his ielde .xxiii. wintra 7 .ccc. 7 .xcvi. wintra þæs þe his cyn ærest Wesseaxna lond on Wealum ge<e>odon.

[60BC]

AER CRISTES GEFLÆscnesse .lx. wintra, Gaius Iulius se casere ærest Romana Bretenlond gesohte 7 Brettas mid gefeohte cnysede 7 hie oferswiþde 7 swa þeah ne meahte þær rice gewinnan.

1AD

Octauianus ricsode .lxvi. wintra, 7 on þam .xlii. geare his rices Crist wæs acenned.

2

Þa tungelwitgan of eastdæle cuomon to þon þæt hie Crist weorþedon 7 þa cild on Bethlem ofslægene wærun for Cristes ehtnesse from Herode.

3

Her swealt Herodus from him selfum ofsticod, 7 Archilaus his sunu feng to rice.

6

From frymþe middangeardes þis gear wæron agan .v. þusendu wintra 7 .cc. wintra.

12

Philippus 7 Herodes todęldun Lysiam 7 Iudeam feoþericum todęldun.

16

Her feng Tiberius to rice.

26

Her onfeng Pilatus gyminge ofer Iudeas.

30

Her wæs Crist gefulluhtud 7 Petrus 7 Andreas gehwierfede 7 Iacobus 7 Iohannes 7 Philippus 7 þa .xii. apostolas.

33

Her wæs Crist ahangen, from fruman middangeardes ymb .v. þusendo wintra 7 .cc. 7 .xxvi. wintra.

34

...

35

...

39

...


Note intro.1

The A-scribe appears to have skipped ahead to the end of the clause for Ceawlin's reign. If this is a case of eye-skip, I would expect both clauses to end consistently. So is winter or gear the correct reading?


Note intro.2

The A-scribe appears to have skipped ahead to the length of Cenwalh's reign.


Note intro.3

The B-scribe appears to have skipped ahead to the length of Beorhtric's reign.


Note intro.4

The B-scribe marked the position of the omitted clause for Cuþred's reign with a suprascript cross, though no text was supplied.


Note intro.5

The B-scribe marked the position of the omitted clause for Ęþered's reign with a suprascript cross, though no text was supplied.


Note intro.6

"B" diverges here, extending the regnal list to Edward.